Eph 5 | MED | STEP | Enim Got ndi, numan ngorum kangambuⱡa kᵾⱡ mormin. Ei pilik, elim mondᵾk pilik muⱡᵾi!

Ephesians 5

Tᵾn Rᵾⱡang Pum Ila Ʉndamᵾn

1 Enim Got ndi, numan ngorum kangambuⱡa kᵾⱡ mormin. Ei pilik, elim mondᵾk pilik muⱡᵾi! 2 Enim nga kont mul uⱡ ei, wamp numan ngui uⱡ ei ndi, kindmant endangga! Kraist itim ei mel, tᵾn numan ngumba, elim nga kont mul uⱡ ei, tᵾn nga nᵾndpa wak ropa elim ndi, elim nga kᵾng ei, Got kᵾn atinga ropa kaⱡpa tindiⱡim munduⱡnga, mura pilpa kai pitim.

3 Enim Got nga kangambuⱡa kᵾⱡ mormin ei pilik, wapra rui uⱡ, uⱡ kol, wote ik kol rui uⱡ na, kandpa kum pindi uⱡ kit mbᵾ nga ik ti, enim nga ruk tinga ila, pi nᵾpangga! 4 Wote, ik kit nᵾk, pundma rok, ik roldᵾnga na mat ni nandᵾk, Got kᵾn angk ning uⱡ ei, ombil pendᵾk itᵾi! 5 Enim kor pᵾtmin ni, wamp ti wapra rui uⱡ kit mbᵾ etpa, uⱡ ⱡar mul na, mel minal kandpa numan pendpa etᵾm. Ei, uⱡ kᵾⱡ tᵾpa, elim nga got randpa, Got kupa wak rorum. Ei nga, Kraist kᵾn Got raⱡ nga tᵾpa mumuk rui kona ila, ruk mba mel mon. 6 Wamp ti ndi, ik muⱡ pi nᵾpi mat nimba, enim kol ropa ngumba etmba ei, tᵾk mendᵾk muⱡᵾi! Nambuⱡ emel, Got nga popᵾⱡ ei, ik tᵾk roi ndurmin wamp mbᵾ kᵾn orum. 7 Ei nga, wamp i etpa mbᵾ kᵾn puk, rup rui nᵾrᵾi!

8 Enim unt rumbᵾⱡ ila morung ni, wote akup, enim Nuim ei nga rᵾⱡang ila mormin. Ei nga, enim rᵾⱡang ila mormin wamp mbᵾ mel, ralk muⱡᵾi! 9 Rᵾⱡang ei ndi, uⱡ kun kai na, nombuⱡa mam kun ᵾndi na, ik kupa ni uⱡ mbᵾ etpa oⱡa tᵾtᵾm. 10 Nuim ei etᵾk, numan kai pinding uⱡ mbᵾ nga mint pilik, kandᵾk tᵾk itᵾi! 11 Wamp ndi, uⱡ kurpa rumbᵾⱡ muⱡi eng uⱡ mbᵾ, kandkᵾn ok, tᵾkᵾn molkᵾn, uⱡ eng mbᵾ mekᵾn rᵾⱡang ila, ekit okᵾn tᵾkᵾn, pena ila pindi! 12 Ei nambuⱡ emel, mo rok uⱡ kit etmin mbᵾ, para ndupᵾn nimin ei nga, pipil etᵾm. 13 Wote, rᵾⱡang ei ndi, uⱡ kit mbᵾ, etpa mot nduⱡnga, uⱡ kit mbᵾ, kandᵾp mbi ndurmun. 14 Rᵾⱡang ei ndi, mel mbᵾ pora, etpa mot ndupa pena ila telinga, wamp ndi, kandᵾk pora ndurmin. Uⱡ ei nga, Buk Wingti ila, ik koⱡmung kat ndi, nimba mel,

“Nim ur mint pekᵾn morᵾn wamp ei, rut na, on kona ila ⱡoporᵾk oⱡa moⱡa! Wote Kraist nga rᵾⱡang ei nim kᵾn wangga!” nᵾtᵾm.
15 Enim wamp kᵾn muⱡi orunga, tᵾk mendᵾk muⱡᵾi! Numan kun pindi nᵾpᵾndi wamp mel, pek muⱡi nᵾmbᵾⱡᵾi! Wote, numan kun pindi wamp mel, pek muⱡᵾi! 16 Akup ui kit monmᵾn ila, Got nga uⱡ kai mat inding nda, akup ei kᵾn itᵾ! Wote ui ei, tᵾk kawa ndui nᵾndᵾ! 17 Enim wamp wᵾlᵾ mel ralk, muⱡi nambᵾlk, Nuim ei ndi, enim namba uⱡ iteing nimba, numan orunga mbo rondum ei, pilik tᵾk mendᵾk itᵾi! 18 Enim nu ronduⱡ nok kekilip rui nᵾrᵾi! Uⱡ ei ndi, enim etpa kit mondᵾmba. Ei kelik, Muⱡnga Wingti ei, enim kᵾn omba, peka rangga muⱡᵾi! 19 Angmᵾn mat kᵾn, ik kai mbᵾ nᵾk, mbi paka kinan mbᵾ nᵾk, int yant etᵾk, Nuim ei kᵾn, rom kaip mbᵾ numan kai pendᵾk, mbi paka rᵾi! 20 Got Tipam ei ndi, mel mbᵾ pora ngurum ei nga, Nuim Jisas Kraist nga mbi ila, rᵾk rᵾk angk nᵾk muⱡᵾi!

Amp Mbᵾ Kᵾn Wamᵾl Kᵾn

21 Enim Kraist tᵾk ou nduk molk kᵾn, aiya angmᵾn mat nga mana orunga muⱡᵾi! 22 Amp mbᵾ, enim Nuim ei, tᵾk ou ndurmin. Ei mel, wanᵾmᵾl kᵾn, i ku itᵾi! 23 Nambuⱡ emel, wu ei nga ronduⱡ ei, oⱡa orunga tetᵾm. Ei mel ku, Kraist ei, elim nga manga rapa tenda ila wamp mormin mbᵾ nga ronduⱡ, tepa oⱡa orunga morum. Kraist elim, elim nga rapa tenda ila wamp kᵾⱡ, elim nga kᵾng ei nga Etpa Ti Wu ei. 24 Ei nga, Got nga rapa tenda wamp mbᵾ, Kraist nga mana orunga mormin. Ei mel ku, enim amp mbᵾ, wanᵾmᵾl nga mana orunga mint muⱡᵾi!

25 Wote Kraist ndi, elim nga manga rapa tenda wamp mbᵾ numan ngumba, elim nga kᵾng kᵾⱡ wak rurum. Ei mel ku, enim wu mbᵾ, ambᵾnᵾmᵾl mbᵾ, numan ngᵾi! 26 Kraist ndi, elim uⱡ ei etpa, elim nga rapa tenda ila wamp tᵾpa, Got kᵾn rukᵾr ndurum ei, elim nga ik ila, nu tindilinga eng nomba kai itim. 27 I itim ei etpa kᵾn, elim nga manga rapa tenda ila wamp mbᵾ, elim kᵾn rukᵾr tᵾpa, etpa mon mundpa, etpa kai itim. Wote ping nomba ⱡar moⱡpa, iti nᵾtᵾtᵾm mon! 28 Wu mbᵾ, en enim nga kᵾng ei, numan ngurmin ei mel ambᵾmᵾl mbᵾ kᵾn, i ku iteing. Wu ti, ambᵾm numan ngorum ndam, elim ndi, elim numan ngorum. 29 Wamp ti, elim nga kᵾng ei kᵾn, kit pili napᵾtᵾm mon! Elim rᵾng ropa nokundᵾpa etᵾm. Ei mel ku, Kraist elim nga rapa tenda ila wamp i etpa ku etᵾm. Nambuⱡ emel, tᵾn wamp ei, elim nga kᵾng ila rop kundᵾp mormun. 31 Buk Wingti ila nimba mel,

“Uⱡ puⱡ ila, wu ei ndi, tipam mam raⱡ wak ropa, wote ambᵾm kᵾn omba, kup etᵾm. Wote, wamp raⱡ omba kᵾng tenda purum,” nᵾtᵾm.
32 Buk Wingti ila ik mong ninim kᵾⱡ, ik kupa ti ninim. Wote, na pᵾnt ei, Kraist kᵾn, elim nga manga rapa tenda ila wamp kᵾⱡ kᵾn, nimba mundnᵾm nᵾmp pᵾnt. 33 Wote, enim wu amp kᵾⱡ kᵾn, nimba mundnᵾm ku! Wu mbᵾ pora, elim ndi, elim numan ngorum ei mel, ambᵾmᵾl mbᵾ, ei mel ku numan ngᵾi! Wote, enim amp mbᵾ, wanᵾmᵾl tᵾk ou mint ndᵾi!